د ناروې د کډوالو شورا مشر: افغانستان له پامه غورځول شوی، بشري اړتیاوې مخ په زیاتېدو دي

اشتراک گذاری:

بریانیوز جمعه (۲۰/ سنبله /۱۴۰۵هـ.ش)

کابل — د ناروې د کډوالو شورا مشر جان اېګلنډ وايي، افغانستان داسې مهال له نړیوالې پاملرنې څخه پاتې شوی چې د دغه هېواد بشري اړتیاوې ورځ تر بلې زیاتېږي

اېګلنډ ویلي، په افغانستان کې میلیونونه خلک لا هم له بېوزلۍ، بې‌ځایه کېدو او د لومړنیو خدمتونو له کمښت سره مخ دي، خو د بشري مرستو لپاره نړیوال تمویل په پرله‌پسې ډول کم شوی دی

نوموړي ټینګار کړی چې د افغانستان روان بشري بحران باید د نړیوالې ټولنې له اجنډا څخه ونه لوېږي او د اړمنو خلکو د ملاتړ لپاره باید لازمې مرستې برابرې شي

د ناروې د کډوالو شورا مشر خبرداری ورکړی چې د مرستو کمښت به د هغو کورنیو وضعیت لا پسې خراب کړي چې د خوړو، سرپناه، روغتیايي خدمتونو او نورو لومړنیو اړتیاوو لپاره پر بشري مرستو تکیه کوي

د هغه په وینا، افغانستان د اوږدمهاله بشري او اقتصادي ستونزو تر څنګ د راستنېدونکو کډوالو له زیاتېدونکي فشار سره هم مخ دی، چې د بشري مرستو اړتیا یې نوره هم پراخه کړې ده