اخبار جهان

ولسمشر ډونالدټرمپ: له ایران سره د جګړې له پیلولو پښېمانه نه یم

اشتراک گذاری:

بریانیوز شنبه (۲۱/ سنبله /۱۴۰۵هـ.ش)

د امریکا ولسمشر ډونالد ټرمپ وايي، له ایران سره د جګړې له پیلولو پښېمانه نه دی، که څه هم مني چې دغه جګړه ښايي د نومبر پر منځمهاله ټاکنو د جمهوري غوښتونکو پر پایلو اغېز وکړي

ټرمپ په یوه مرکه کې ویلي، که بېرته د ورته پرېکړې کولو فرصت ورکړل شي، بیا به هم هماغه اقدام وکړي. نوموړي ویلي، د «پښېمانۍ» په مفهوم باور نه لري او د ایران د اټومي وسلو د جوړولو د مخنیوي لپاره یې د جګړې پرېکړه سمه بللې ده

د امریکا ولسمشر ادعا کړې چې د جګړې له امله یې ملاتړي نه دي ناهیلي شوي، بلکې د ده په وینا، هغوی ویاړي چې نوموړي ایران ته د اټومي وسلې د ترلاسه کولو اجازه نه ده ورکړې

ټرمپ یو ځل بیا ویلي چې د ایران او امریکا جګړه ښايي د نومبر له منځمهاله ټاکنو سمدستي وروسته پای ته ورسېږي. نوموړي ادعا کړې چې تهران هڅه کوي د امریکا پر ټاکنو اغېز وکړي

د جګړې له امله د تېلو او ګازو د بیو لوړوالی په امریکا کې پر اقتصادي وضعیت اغېز کړی او د نومبر ټاکنو ته د جمهوري غوښتونکو د چمتووالي پر مهال په یوه مهم سیاسي بحث بدل شوی دی