مقاله

یان ایگلند: له طالب چارواکو مې د نجونو د زده‌کړو د بیا پیل غوښتنه کړې

اشتراک گذاری:

بریانیوز شنبه (۲۱/ سنبله /۱۴۰۵هـ.ش)

کابل — د ناروې د کډوالو شورا مشر یان ایگلند وايي، په کابل او کندهار کې یې د اسلامي امارت له یو شمېر مشرانو سره لیدلي او له هغوی یې غوښتي چې له شپږم ټولګي پورته د نجونو زده‌کړې بېرته پیل کړي

ایگلند ویلي، د افغانستان له چارواکو سره په لیدنو کې یې د نجونو د زده‌کړې موضوع په څرګند ډول مطرح کړې او ټینګار یې کړی چې افغان نجونې باید له لومړنیو زده‌کړو وروسته هم د ښوونځي د دوام حق ولري

د ناروې د کډوالو شورا مشر د افغانستان د بشري وضعیت په اړه هم اندېښنه څرګنده کړې او ویلي یې دي چې د افغان ښځو او نجونو د زده‌کړو او کار حقونه باید خوندي شي

په افغانستان کې له شپږم ټولګي پورته د نجونو پر زده‌کړو بندیز لا هم دوام لري او د دې پرېکړې له امله میلیونونه افغانې نجونې له منځنیو او لوړو زده‌کړو بې‌برخې شوې دي

ایگلند ټینګار کړی چې د افغانستان د ستونزو د حل لپاره د بشري مرستو ترڅنګ، د ښځو او نجونو د زده‌کړو او کار زمینه هم باید برابره شي

د ناروې د کډوالو شورا له اوږدې مودې راهیسې د افغان نجونو د زده‌کړو د حق د بېرته ترلاسه کولو غوښتنه کوي او د دې بندیز د پای ته رسېدو لپاره یې پر اسلامي امارت د نړیوالو فشارونو غوښتنه کړې ده