اخبار جهان

د امریکا دفاع وزیر: امریکا د هرمز تنګي کنټرول په لاس کې لري او له ایران سره جګړه به پای ته ورسوي

اشتراک گذاری:

بریانیوز شنبه (۲۱/ سنبله /۱۴۰۵هـ.ش)

د امریکا د دفاع وزیر پیټ هېګست ویلي، د هرمز تنګي کنټرول د امریکا په لاس کې دی او واشنګټن به له ایران سره روانه جګړه پای ته ورسوي

هېګست دا څرګندونې د سپټمبر د ۱۱مې د بریدونو د ۲۵مې کلیزې په مناسبت د پینټاګون په یوه غونډه کې کړې دي. نوموړي ټینګار کړی چې ایران به هېڅکله اټومي وسلې ترلاسه نه کړي

د امریکا د دفاع وزیر ویلي، واشنګټن د هرمز تنګي د کنټرول لپاره پوځي وړتیا لري او د ایران پر وړاندې فشارونو ته به دوام ورکړي. هغه تر دې وړاندې هم ویلي وو چې د امریکا سمندري ځواکونه کولی شي په دغه مهمه سمندري لار کې خپل عملیات تر هغه وخته وساتي چې اړتیا وي

هېګست زیاته کړې چې پر تهران اقتصادي فشارونه هم مخ پر زیاتېدو دي. د امریکا چارواکي وايي، د دغو فشارونو یوه موخه د ایران د اټومي پروګرام مخنیوی او د جګړې د پای ته رسېدو لپاره پر تهران فشار راوړل دي

خو نوموړي د جګړې د پای ته رسېدو لپاره کومه مشخصه نېټه یا د دې بهیر د څرنګوالي په اړه نور جزئیات نه دي ورکړي. د وروستیو راپورونو له مخې، سره له دې چې امریکا ادعا کوي د هرمز تنګي په بیا پرانیستلو کې یې پرمختګ کړی، له ایران سره جګړه لا هم روانه ده