سیاست

امریکا: د ایراني چارواکو د ویزو په اړه ملي امنیت ته تر ټولو لوړ لومړیتوب ورکوو

اشتراک گذاری:

بریانیوزچهار شنبه (۲۵/ سنبله /۱۴۰۵هـ.ش)

د امریکا د بهرنیو چارو وزارت وايي، د ایراني چارواکو لپاره د ویزو د صادرولو په بهیر کې د ملي امنیت او عامه خوندیتوب تر ټولو لوړ معیارونه په پام کې نیول کېږي

د دغه وزارت د څرګندونو له مخې، د ډونالډ ټرمپ حکومت د ویزو د ارزونې پر مهال هڅه کوي د امریکا د هېواد او وګړو د ساتنې لپاره امنیتي ارزونې په جدي توګه ترسره کړي

د امریکا د بهرنیو چارو وزارت ایران‌انټرنشنل ته په ځواب کې ویلي، واشنګټن د ملګرو ملتونو د کوربه هېواد په توګه خپلو نړیوالو ژمنو ته هم جدي پابند دی

دغه وزارت زیاته کړې چې د بهرنیو پلاوو د سفر په اړه د امریکا د بهرنیو استازولیو د قانون له مخې، د بهرنیو پلاوو د غړو پر تګ راتګ ځینې محدودیتونه یا شرایط لګول کېدای شي

د وزارت په ځواب کې دا روښانه شوې نه ده چې د ایران کومو چارواکو ته ویزې صادرې شوې یا رد شوې او یا هم د ملګرو ملتونو د عمومي غونډې لپاره د ایراني پلاوي پر سفر به کوم مشخص محدودیتونه ولګول شي