سیاست

محمود خان اڅکزی: پاکستان د ماتېدو پر دوه‌لارې ولاړ دی، اساسي قانون باید حاکم شي

اشتراک گذاری:

بریانیوز سه شنبه (۲۴/ سنبله /۱۴۰۵هـ.ش)

د پښتونخوا ملي عوامي ګوند مشر محمود خان اڅکزي د افغانستان او عراق په اړه د امریکا او اروپايي هېوادونو پر سیاستونو سختې نیوکې کړې او ویلي یې دي چې لوېدیځو هېوادونو د خپلو ملي ګټو د خوندي کولو لپاره په دغو هېوادونو کې د جګړو پر مهال د میلیونونو انسانانو د وژل کېدو زمینه برابره کړې ده

اڅکزي ویلي، د افغانستان او عراق جګړو نه یوازې د دغو هېوادونو پر سیاسي او اقتصادي وضعیت ژور اغېز کړی، بلکې د سیمې پر ثبات یې هم دروند سیوری غوړولی دی

نوموړي د پاکستان اوسنی وضعیت هم د اندېښنې وړ بللی او خبرداری یې ورکړی چې دغه هېواد د ماتېدو پر دوه‌لارې ولاړ دی. د هغه په وینا، که د هېواد د سیاسي او اداري ستونزو د هواري لپاره اساسي ګامونه پورته نه شي، وضعیت به لا پسې کړکېچن شي

د پښتونخوا ملي عوامي ګوند مشر ټینګار کړی چې په پاکستان کې باید اساسي قانون په بشپړه توګه حاکم شي او ټولې ادارې باید د قانون له چوکاټ سره سم خپل مسوولیتونه ترسره کړي

اڅکزي همداراز ویلي چې پوځ باید له سیاست څخه ووځي او د هېواد د سیاسي پرېکړو واک باید ملکي ادارو او په ځانګړي ډول پارلمان ته وسپارل شي. هغه پارلمان د خلکو د رایو پر بنسټ د واک اصلي سرچینه بللې ده

نوموړي د پښتنو او بلوڅانو د سیاسي، اقتصادي او اساسي حقونو پر خوندیتوب هم ټینګار کړی او ویلي یې دي چې د پاکستان د ثبات لپاره د ټولو قومونو او سیمو حقونو ته درناوی اړین دی

اڅکزي دغه څرګندونې په داسې حال کې کړې چې په پاکستان کې د سیاسي واک، د پوځ د رول او د قومونو د حقونو په اړه بحثونه لا هم تود دي