د طالبانو او تاجکستان ترمنځ د اړیکو نوی پړاو؛ د یوسف وفا سفر د سیمې د سیاست په ډګر کې تازه څپه راولاړه کړې

د طالبانو د بلخ والي او د ملا هبت‌الله اخندزاده نږدې ملګري، مولوي یوسف وفا، د تاجکستان د حکومت په رسمي او ناڅاپي بلنه دوشنبې ته سفر کړی دی. دا سفر چې د طالبانو د پلویانو له‌خوا په ټولنیزو شبکو کې د “بریا او سیاسي لاسته‌راوړنې” په توګه ستایل شوی، د سیمې د سیاسي فضا په بدلېدو کې مهم ګڼل کېږي

وفا د خپل سفر پر مهال له لوړپوړو تاجک چارواکو سره لیدلي او د دواړو هېوادونو ترمنځ د سرحدي امنیت، سوداګرۍ او سیاسي اړیکو د پیاوړتیا په اړه یې خبرې کړې دي. د طالبانو پلویان ادعا کوي، چې دا سفر به د تاجکستان دننه د طالبانو د مخالفو ډلو اغېز نور هم کمزوری کړي

سیاسي شنونکي وایي، دا لیدنه د طالبانو او تاجکستان ترمنځ د باور او همکارۍ د یو نوي فصل پیل دی. د دوی په باور، د طالبانو د مخالفو جبهاتو کمزوری حضور، او د روسیې او د منځنۍ آسیا هېوادونو زیاتېدونکی تمایل د طالبانو پر لور، امام‌علي رحمان دې ته اړ کړی چې له طالبانو سره اړیکې پراخې کړي

یو افغان څارونکی وايي:

تاجکستان په سیمه کې له امنیتي او اقتصادي واقعیتونو سره د سمون په هڅه کې دی.

 له همدې امله، د طالبانو سره اړیکو ته د نوې پاملرنې پيل کول، د دوی د ملي ګټو برخه ګرځېدلې ده

دا سفر په داسې حال کې ترسره شوی، چې تاجکستان له ۲۰۲۱ کال راهیسې د طالبانو حکومت رسمي نه دی پېژندلی، خو وروستي تماسونه ښيي چې دوشنبې د تعامل او خبرو لور ته روانه ده

د سیاسي کارپوهانو په وینا، دا سفر د طالبانو لپاره یو مهم ډیپلوماټیک ګام دی، ځکه دا لومړی ځل دی چې یو لوړپوړی طالب چارواکی د تاجکستان د رسمي بلنې له مخې دغه هېواد ته سفر کوي

سره له دې چې د دې لیدنې ټول جزئیات نه دي رسماً خپاره شوي، خو تمه کېږي چې د یوسف وفا دا سفر به د افغانستان شمالي پولو د امنیت، د سوداګرۍ د پیاوړتیا او د سیمه‌ییزو اړیکو د بیا رغونې په برخه کې مهم رول ولوبوي

په ټوله کې، شنونکي باور لري چې دا لیدنه د طالبانو لپاره یوازې یو رسمي سفر نه دی، بلکې د منځنۍ آسیا په سیاست کې د دوی د حضور او مشروعیت د پیاوړتیا یو څرګند پیغام دی