گلبدین حکمتیار: ولی افغانان سپكاوي سره ايستل كېږي او پرهېواد یې د برید ګواښونه کېږي؟

ګلبدین «حکمتیار» د پاكستان پارلمان ته پرانستى ليك

ولی افغانان سپكاوي سره ايستل كېږي او پرهېواد یې د برید ګواښونه کېږي؟

بریانیوز:(سه شنبه۶ عقرب/لړم)ګلبدین حکمتیار، د حزب اسلامی افغانستان رهبر په «پاکستاني پارلمان ته پرانستې لیک» کې د پاکستان پرهغو سیاستونو سخته نیوکه کړې چې افغان مهاجرینو ته “نمک‌حرام” وایي او په زور، سپكاوي او اهانت سره ايستل كېږي او د هغوی کورونه ورانوي.

ښاغلی حکمتیار لیکلی: دوه مسلمان گاونډي هېوادونه د خطرناك جنگ په درشل كي دي، څو میليونه مهاجرين په زور، سپكاوي او اهانت سره ايستل كېږي او كورونه ئې په بلدوزرو ورانېږي، د ترحم، مروت او انساني اخلاقو خلاف؟! نه پوهېږو د پاكستان پارلمان ولي د دې حساس وضعيت په اړه واضح او قاطع دريځ نه لري، او د بدو پايلو مخنيوى نه كوي؟!

حکمتیار پخپل مقاله کی پاکستان ته دامریکا د دوه مخی سیاست( په ظاهرتشویق اوپه پته غندنه) یادونه کوی او وایی: نن همغه مخكينۍ تجربه بيا تكرارېږي، د افغانستان او پاكستان تر منځ د جنگ په ارتباط په څرگنده يوه خبره او په پټه د هغې سل په سلو كي خلاف بله خبره!! 

حکمتیارپخپل مقاله کی زیاته کړې:« یوه داسې سرلوړې ملت ته سپکاوی او پر هېواد یې د برید ګواښونه کېږي چې د همدغو ګاوندیو هیوادونو د غلطو سیاستونو قرباني شوي،

هغه پوښتنه کړي چې ولې د ترحم او انساني اخلاقو خلاف څو میلیونه مهاجرین په زور، سپکاوي او اهانت سره ایستل کېږي او کورونه یې په بلدورزو ورانېږي؟»

د ښاغلی حکمتیار په مقاله کی  راغلی:« ولي هغه څه كېږي چي هند ئې غواړي؟ ولي د (بي ال اې) او (ټي ټي پي) غچ له افغان مسلمان ولس او افغان مهاجرينو اخيستل كېږي؟ په پاکستان کی د مخالفو جنگیالیو عمليات خو هغه مهال پيل شوي چي د ناټو ځواكونه لا په افغانستان كي وو، همغه محال امريكا هند ته اجازه وركړې وه چي د پاكستان مخالف وسله وال وروزي او وپالي. »

حکمتیار زیاته کړی:« د پاکستان دولت د افغانانو د مهاجرت په فاجعه کی شریک دی ځكه د افغانستان په اشغال كي ئې د امريكا بشپړه مرسته وكړه، د امريكا بريد هم د پاكستان د فضاء او زمكي له لاري وو»

هغه وایی:« كه د شوروي ځواكونو له وتلو وروسته په افغانستان كي د افغان ولس د خوښي حكومت جوړ شوى واى او اسلام آباد د (كي جي بي) او (سي آى اې) د خوښي ائتلاف ملگرتيا او مرسته نه واى كړې، نو نه به مهاجرين تر ننه په پاكستان كي پاته شوي وو، نه به خبره د امريكا له لوري د افغانستان شل كلن اشغال ته رسېدله او نه به نن پاكستان او افغانستان د خونړي خپلمنځي جنگ په درشل كي وو.»

ښاغلی حکمتیارلیکی:« كه مخكيني مهاجرين په پاكستان كي پاته شوي او كه د امريكا له لوري تپل شوي جنگ له امله نور مهاجرين پاكستان ته تللي، اسلام آباد ئې په مسئوليت كي شريك دئ، ځكه د افغانستان په اشغال كي ئې د امريكا بشپړه مرسته وكړه، د امريكا بريد هم د پاكستان د فضاء او زمكي له لاري وو او اكمالات ئې هم د پاكستان له لاري، جنرال پرويز مشرف څومره افغانان لاس تړلي امريكا ته وسپارل؟ كه د شوروي ځواكونو له وتلو وروسته په افغانستان كي د افغان ولس د خوښي حكومت جوړ شوى واى او اسلام آباد د (كي جي بي) او (سي آى اې) د خوښي ائتلاف ملگرتيا او مرسته نه واى كړې، نو نه به مهاجرين تر ننه په پاكستان كي پاته شوي وو، نه به خبره د امريكا له لوري د افغانستان شل كلن اشغال ته رسېدله او نه به نن پاكستان او افغانستان د خونړي خپلمنځي جنگ په درشل كي وو.»

ښاغلی حکمتیارد خپل مقالی په لړکی هغه لوی نظامی او سیاسی خطرونه چه د پاکستان دولت متوجه وو اشاره کوی او وایی:«شوروي به پر پاكستان له غرب بريد كولو او هند له شرق، او د پاكستان دننه به روس پلو او هند پلو گوندونو همغه څه كول چي د دوى ملگرو په افغانستان كي وكړل، نه پوهېږم هغه چي نن افغانانو ته د نمك حرام خطاب كوي دا ئې په ياد ده كه نه چي دغو ډلو د پاكستان په ښارونو كي سره بيرغونه رپول او پاكستان ته د شوروي ځواكونو د راتلو لپاره نڅېدل؟.

ښاغلی حکمتیار وروسته ایران وضعیت ته اشاره کوی او وایی:« تاسو به حتماً خبر يئ چي ايران هم تر پاكستان زيات افغان مهاجرين وايستل، خو نن ئې د كابل له حكومت غوښتي چي دوه لكه  افغانان د كارگرانو په نامه ايران ته واستوي، هرعقلمن او د سيمي له حساس وضعيت باخبر وگړي ښه پوهېږي چي د دې تصميم تر شا څه دي؟!» هغه وایی: د دې سيمي جنگي فضاء، ايران ته د امريكا او اسرائيل گواښونه، كابل ته د پاكستان د بريد اخطارونه او... د دې باعث شوي چي تهران له كندهار سره دا معامله وكړي، ډېر تحليلگران داسي انگېري چي دا د افغانستان او ايران له جنگي حالت سره تړاو لري. »

ښاغلی حکمتیار د مقالی په وروستی برخه پاکستان ته په خطاب وایی:« د پاكستان وسله وال مخالفين نه طالبانو رامنځته كړي او نه كوم بل افغاني لوري، د شل كلن اشغال په دوران كي فعال شوي، كه هند كومي ډلي پاللي او روزلي، نو پړه ئې پر امريكا ده چي هند ته ئې د افغانستان له لاري د پاكستان خلاف د استخباراتي فعاليتونو اجازه وركړې وه، كه پاكستان په دې اړه له چا گيله كوي نو هغه بايد امريكا وي نه افغانان.»

گلبدین«حکمتیار» د حزب اسلامی امیر په پای کی د پاکستان دولت نه غوښتنه کړی چه د افغانستان په اړه رغنده او ثابت سیاسی تگلاره غوره کړی ترڅو د يو د بل په كورنيو چارو كي له مداخلاتو او د وسله والو مخالفينو له حمايت او ملاتړ پرته په عالانه او معقوله توگه خپل تول مشکلات حل کړی.