نړیوال مشران: د روسیې پر ضد د جګړې د پای ته رسولو د امریکا پلان لا هم بشپړتیا ته اړتیا لري

د اوکراین جګړې د ختمولو لپاره د امریکا تازه وړاندیز د نړۍ د یو شمېر مهمو مشرانو له لوري د “نیمګړي” په توګه یاد شوی او دوی ټینګار کوي چې دا طرحه باید نوره هم پخه، واضح او د ټولو اړخونو د اندېښنو مطابق شي. دا خبرې وروسته له هغه شوي چې دغه وړاندیز په کییف او د هغه په لوېدیځو متحدانو کې د سختو اندېښنو لامل شو

مشرانو ویلي چې د واشنګټن وړاندیز د جګړې د پای ته رسولو لپاره یو مهم ګام دی، خو اوسنی شکل یې کافي نه دی او ښايي په سیمه کې د ناڅاپي ناامنۍ، ابهام او فشارونو لامل شي. د هغوی په وینا، د هرې سولې نقشه باید داسې جوړه شي چې د اوکراین ملي حاکمیت، تمامیت ارضي او امنیت په کې روښانه تضمین شي

کییف دغه پلان له اندېښنو سره بدرګه کړی او ویلي یې دي چې هر هغه وړاندیز چې د جګړې د بشپړ پای پر ځای له روسیې سره د امتیازاتو په معامله بدلېږي، د اوکراین لپاره د منلو وړ نه دی. د اوکراین چارواکو ویلي چې دوی نه غواړي داسې یو تړون ته غاړه کېږدي چې د روسیې د بیا حملې لپاره زمینه برابره پرېږدي

لوېدیځ متحدان، په ځانګړي ډول اروپايي هېوادونه، وایي چې هر هغه پلان چې د جګړې د پای لپاره وړاندې کېږي باید د نړیوال قانون له اصولو سره سم وي، او په کې د روسیې د یرغل غندنه او د اوکراین د خاورې دفاع واضح ځای ولري

سیاسي شنونکي وایي چې د امریکا پلان د یوې پراخې، خو ناسمې نقشې په څېر دی چې د بشپړ عملي کېدو لپاره زیات کار ته اړتیا لري. د دوی په باور، که نړیوال متحدان په ګډه روښانه چوکاټ جوړ نه کړي، نو داسې وړاندیزونه ښايي د جګړې د اوږدېدو یا د اوکراین د امنیت د کمزورتیا سبب شي

نړیوال مشران تمه لري چې د امریکا د دې وړاندیز بله نسخه به له همغږۍ او واضح ضمانتونو ډکه وي، څو د جګړې د ختمېدو لپاره د پاید ارې او عادلانه سولې واقعي زمینه برابره کړي